Aija Korneja

Aija Korneja dz. 29.09.1967. Ančipovas cīmā Marijas (dz.Vizules nu Zelčīm) i Juoņa Šakinu saimie. Teiceja, rūtaļu zynuotuoja, kulinārīs mantuojums. Ir muocejusies Upītes pamatškolā, tod Rekovas vydškolā. Tod pazamuoceja Līpuojā i Riezeknie, bet tuo i nasanuoca pabeigt. Veirs nu Viļakas Einārs Kornejs. Kūpā izaudzāti 6 bārni. Jou školas laikūs kūpā ar škoļnīkīm pīzadaleja etnografiskejā pulciņā. Nu 1985.goda ar Eināru suoka doncuot Upītes jaunīšu kolektīvā. Abi kūpā beja iz festivālu "Balica" Lītuvā.

Aija Korneja 2020 godie

Aija Korneja - 2020.godie 

Aija Korneja (2.ryndā pyrmuo nu kreisuos puses) Upītes pamatškolas 80 godu jubilejā 1990.godie

Aija ir vīna nu jaunuokejuom etnografiskuo ansambļa sīvuom, kas ari tādin turpynoj pīzadalietīs ansambļa darbībā. Kūpā ar ansambļa sīvuom dzīd saļmas par myrušejīm i maijā zyn dzīdojumus pi krysta.

Aija sīn gordus sīrus. Jei zyn gon tradicionalū čymunu sīra recepti, gon nazabeist eksperimentiet i jai tys izadūd labi. Muok izcept gordu boltū maizi. Upītes školas pastāviešonas laikā, kod vādzieja uznimt gostus ir bejuse saimenīca, kas paleidz kluot goldus. Ir bejuse ari kuozu saimenīca i var saguoduot eistu Latgalīšu kuozu goldu. Pi Austras Slišānes īzamuoceja tortes cept. Tortes cap ari juos meita Ramona. Aija ir ari lobs organizators, prūt nūvadiet spieļu i rūtaļu vokarus.

Aija Korneja (pyrmuo nu kreisuos puses) 1.klasie 1975.godie

Aijai cīši labi pazadūt masku gotovuošona. Jei ir sašyudynovyse vysuodus tālus. Vīns nu īspaidīguokejīm ir bejs bišu spīts ar naskaitamuom bitiem apkuort, kuras pašai beja tamburietas. Dorba mīlestību i radūšumu ir īmontovuši ari Aijas bārni i mozbārni.

 Aija Korneja ar tautastierpu un tumšīm kuplīm motīm, Upītes pamatškolas 80 godu jubilejā 1990.godie




Pirkumu grozs