Renārs Kornejs
Renāra pyrmīs bārnu dīnu cīms beja Ančipova. Jis pīdzyma 1988.goda 28. martā, Aijas i Eināra Korneju kuplajā sešu bārnu saimie kuo vacuokīs dāls.
Suokumā muocejuos Upītes pamatškolā. Renārs atsaceruos agrūs reitus, kod kotru dīnu 4 kilometri beja jyuoīt kuojuom iz školu. Tod puorzaciele dzeivuot iz Upīti. Kod baba palyka vacuoka i naspiecīguoka, tod Renārs suoka dzeivuot pi juos i sova krystāva Juoņa. Tuoluok muocejuos Rekavas vydškolā. Vāluok īzastuoja Riezeknes augstškolā, bet napabeidze. Malnavas koledžā pabeidza lauksaimnīcības vadību.
Renārs myusu pusie ir lyls bitenīks. Izaruodīs, ka juo vacīstāvs Juoņs Šakins beja lyls bitenīks, bet kūpā ar vactāvu jam nasanuoca draviet. Mozs puika byudams Renārs guoja paleigā radenīkam Broņislavam Loginam nu Begunovas. Broņiks beja lobs bitenīks. Tuo paleidzūt jam jis i izamuoceja pyrmuos īmaņas pi bišu. Renārs soka, ka Broņislavs ir bejs lobs školuotuojs i stuostnīks. Jis ar sovīm stuostīm pi bišu spieja īinteresiet i īmuoceja mīliet biškūpību.
Renārs soka, ka pat bišu kūdumi jam pateikūt i smejuos, ka jis ešūt pat drusku kuo mazohists. Kod lyls daudzums bišu sakūžūt, tod gon nav labi, tod pat pi doktara juobrauc.
Broņīks jam ari paleidzeja savuokt juo pyrmū bišu spītu, kū Renārs beja uzguojs kuodā līpā i īdeva Renāram pyrmū paštaisātū strūpu. Pyrmuos bits naizdzeivova pat godu, bet nu tuo Renārs saprats, ka biškūpība jam pateiki i mamma jam nūpierkuse pyrmūs treis bišu strūpus i nu tuo suokuos jam sova bišu saimnīcība. Renāram beja kuodas 45 bišu simes, kod jis īzapazyna ai sovu kundzi Gintu, kas ari beja nu lylas bitenīku saimes i tuo jī suoka saimnīkuot kūpā. Tādin iz 2023. godi jīm ir puori 200 bišu saimiem. Tys ir jūs golvanīs dorbs – bizness. Renārs stuosta, ka suokūt nu juo dzimšonas dīnas suokuos jou intensīvīs dorbs pi bitiem, kas beidzuos oktobrie, kod vusas bites ir īzīmuotas. Golvanuo bišu produkcija ir dažuodu zīdu mads, bet ari pīprasieti, gordi i veselīgi ir ari cyti bišu produkti, kuo - zīdputekšņi, bišu maize, propoliss.
Zīmu bitenīkam ar daudz dorba – ir juosagatavoj vuss jaunejai sezonai. Zīmas sezonā nūteik ari dorbs ar dažuodim bišu produktīm. Nu vaska tīk lītas sveces, kas ir dažuoda lyluma i formu dažuoduom gaumiem. Eipašuo sveču forma ir ar Upītes logo. Renārs gotovoi sveces arī piec senču metodes ar sveces pīaudziešonu ap knotu, kuo ari labpruot doluos pīredzie meistarkasies.
Bez bitiem Renāram ir vieļ vīns lyls lūlojum - jis audzynoj treis burvīgas meitiņas.
Renārs ir lyls doncuotojs folkloras kūpā “Upīte”. Dorbs ar bitiem panam daudz laika, tuopiec doncuošonai vairs naatlīk laika. Renārs prīcojuos par tū, ka juo lyluokuos meitas īt bārnu folkloras kūpā “Upīte” i turpynoj muocietīs Upītes puses dzīsmes, rūtaļas i dančus. Ontons Slišāns ir guojs ekspedēcijuos pi Renāra babas muosuom, leidz ar tū tādinejā upītīšu dzeivesziņā i dzīduotejuos dzīsmies ir ari juo vacmammas dzīsmes i dzeivesstuosti.
Renārs soka, ka laukūs struoduot ir smogi, bet tod kod struodoj ar prīku i patikšonu – vuss smogums aizamierst.
Roksts īvītuots 2023. goda janvarie