Oskars Supe
Oskars Supe ir pīdzims 1974.goda 27. maijā Upītie lylejā Līvijas un Pītera Supes pīcu bārnu saimie.
Oskars beja vacuokīs bārns tuopiec, kuo jis stuosta, ka par aukli ir bejs vusīm sovīm bruoļīm i muosai. Suokumā muocejuos Upītes pamatškolā, tod Malnovas lauksaimnīcības tehnikumā par tehniskū mehanikii. Ir struodovs z/s “Kotiņi”, Rekavas vydškolā par paleigstruodnīku. Vāluok rūbežsardzie suoka srtuoduot par kinologu, Oskaram tod beja vuocu aitu suns Peru. Piec ostiņim nūstruoduotejīm godīm rūbežsardzie, aizguoja tuoluok muocietīs i tādin jam ir augstuokuo izglītība jis ir virsnīks. Par godi Oskars īs izdīnas pensijā, jū jou vairuok kuo 20 godus byus nūstruodovs rūbežsardzie.
Oskars pašmuocības ceļā ir īzamuocejs cept tortes, kuodas jis atsaceruos nu sovas biernības. Kod Oskars beja mozs, Stabļovā dzeivova dzeds Vincs ar babu Lidiju Supes, pi jīm apkuortejī cilvāki iz kuozuom i bieriem pasyuteja cept biskvita tortes i tuoraga plātsmaizes. Tod jou ari suokuos interese par pašcaptuom tortiem i tyka radzāts sagatavuošonas process. Baba sakiula ūlas a dzeds kurynova pečku i cepa torti, baba biskvītus sagrīza i sataiseja krēmus, bet garniešona beja dzeda dorbs. Oskars soka, ka jam kuo bārnam ir tics tikai tū tortu atgrīzumi i garnejumu krēmu trauku izlaiziešona. Pats tortes suok cept tod, kod suok dzeivuot ar sovu saimi Rekovā sovā dvorā.
Oskaram ar sīvu ir divas meitas i dāls. Gribiejuos tū biernības garšu, kas beja palykuse piec dzeda toršu cepšonas i suokuos izmieģinojumu ceļs pi biskvita toršu cepšonas. Oskars soka, ka guojs prasiet pi vīna toršu cepeja, pi ūtra i tādin jou ir izveidovusies sova toršu recepte. Tortes teik captas vusūs saimes svātkūs. Oskars stuosta, ka atīdūt iz itū dvoru bejuse ari riktīguo kruosne, kū nūjaucs i par tū ir tics nu sīvas. Sovas tortes cap cepeškruosnie. Oskara puorzinie ir biskvīta ījaukšona i cepšona, sīva paleidz sajaukt krēmu i garniet. Ja sīva nav dvorā, tod ar tortes cepšonu i garniešonu teik goalā pats.
Vacuokejai meitai vairuok pateik mada torte, tuopiec iz juos svātkīm capam mada torti. Mada tortes capam jou vairuok kuo divdesmit godus, biskvīta tortes kuodus sešus godus. Oskars stuosta, ka torte kotru reizi saīt sovaduoka, kaut gon recepte tādin jou ir vīna i tei pate. Vīnīgi tys, ka cylvakīm ir atširīgas garšas izjyutas, cytam pateik sausuoks biskvīts, cytam sulīguoks. Tortes garniešona ir atkarīga nu cylvāka kam capi voi nūtykumam, kas sagaidams tuo ari tys vierss tīk izrūtuots. Ir ari vusuodi kuriozi ar toršu cepšonu nūtykuši: ar jālu vydu, ar gumejas garšu voi biskvīts sanuocs zaļā kruosā.
Vieļ vīns Oskara vaļasprīks ir zīmas makšķeriešona. Aizraun process, kod ķeruos zivs. Gribīs izvilkt lyluoku i lyluoku. Brauc iz Ploskīni, Orlovu, Svātūni, Uobeļovu, Alūksni i Peipusu. Ir pīzadaliejīs ari sacensībuos, toik nāsūt baigīs “čempers”.
Pateik kūpt sovas muojas apkuortni. Gribīs, lai ir šmuki.
Roksts īvītuots 2023. goda janvarie