Mārīte Slišāne

Mārīte Slišāne, dz. 07.04.1985. Upītie, Ontona i Irēnas Slišānu saimie, kuo jaunuokīs bārns. 

Mārīte Slišāne ar sovuom cipītiem, 2021.gods

Jai ir vieļ divas vacuokuos muosas –  Annele i Lienīte, i bruoļs Andris. Pīdzymyse tīši Lyldīnos, jei smejuos, ka nu to  esūt tei mīlestība pret putnīm i ūluom. Braucūt iz Upīti, lai izbaudietu kulinarū montojumu nūteikti ir juopagaršoi “Māgalines cipīšu” saryupietī gordumi.

Mārīte Slišāne mammai Irēnai kliepie, 1985.gods

Leidz školas vacumam auga pa dvoru vīna pate.  “A tuo i augu vīna, ar sevi pa dīnuom, pate ar sovuom dūmuom, ar gruomatuom (daudz laseja gruomatas, jū mamma struodova bibliotekā, tuopiec tyka izlasietas vusas jaunuokuos gruomatas), īdūmuom… deļ tam laikam i ir tuo, ka ešu tik intraverta i lobuok jyutūs vīna, na starp cylvaku pūļīm. Cik atskrieja tāta nu kolhoza pi mans, iest uztaisiet, voi aizvest iz iednīcu (te Upītie agruok beja iednīca), cytreiz paniema iz kantori leidzā. Bīži kūpā ar tātu apbraukova teirumus juo boltejā Ņivā. Tāta niema kliepie, ļāva stūri grūziet”.

Mārīte Slišāne tātam Ontonam rūkuos, bilde kūpā ar muosuom i bruoli, 1986.gods

Par tātu jei soka tuo: ” Tāta man vīnmār ir bejs tuods ideāls, nazynu, vīnmār esu bejuse lepna, ka man tuods tāta – gudrs, varūšs, ar idejuom bogats, kas beja geniālas, ar juo dorbu, izdūmu, spieju turietīs pi sovim uzskotīm i viertībuom.”

Izamuocejuos Upītes pamatškolā, tod Bulduru Duorzkūpības vydškolā. Buldurus sovā laikā beja beidzs juos tāta. Tod studeja Riezeknes augstškolā filologus, kur studeju laikā, pus godi beja ERASMUS apmainas studijuos Kauņā. Tuopat kuo juos tāta i mamma Mārīte ir struodovuse Upītes bibliotekā. Kod Mārītes tāta atkluoja muzejā kuodu izstuodi, tod Mārīte viel moza byudama cepa peiragus i plātsmaizes, lai uzcīnuotu vusus.

Mārīte Slišāne ar sovuom meituom i dālu, 2019.gods

Nu biernības Mārītei ir patics tys svātku process, ka rūsuos vusi pa virtuvi, taisa vuskaut kū, gaiss smuordoj piec gordumīm. Tādin Mārīte taisa gordumus ar sovu biernības garšu i smuordu, uzsverūt, ka tys ir pats lobuokīs i lutynoi ar sovīm gordumīm ari apkuortejūs cylvakus i Upītes vīsus. Ari Nacionaluo teātra akteri, koris “Balsis”, dažuodi ceļuotuoji ir cīnuoti ar Mārītes captajuom plātsmaiziem. Sovūs gordumūs jei var salikt sovus produktus – ūlas, pīnu, svīstu, tuoragu, kriejumu. Grybīs, lai biernības garša dzeivoj, tuo varūt sazatikt ar tātu, mammu i tuo kuods cyts atceruos sovu biernību apādūt… i tū jei gryb īmuociet sovīm bārnīm – ka tys ir tik garšīgi, najov veikala plauktūs.  Mārītes tortes ir ceļojušas iz tyvuokuom i tuoluokuom vītuom. Tuoluokuos vītas varātu byut Viļaka, Bolvi, Rēzekne, Alūksne, Reiga, Jūrmala. 2021.godā Upītie pīzadaleja “Lauku kafeinīcā”, kur degustiet gordumus brauca cylvaki, nu dažuoduom vītuom.

Vīna nu daudzejuom Mārītes tortiem, 29.08.2021.

Mārīte nu mozuom dīnuom ir bejuse cīši saimnīciska.  Moziņai ir patics ņemtīs ar cuoļīm, vistiņuom i gaili. Tādin lylai esūt jai ir sova dažuodu vistiņu saimnīcība, kas diej kruosainas ūliņas. Gūtiņas Mārīte  slaukt īzamuoceja jov nu 7 godu vacuma. 10 godūs jov saimnīkova vīna pate ap treis i četruom gūviem. Stuosta, ka beja moza grybejuse byut par vetārstu.

Mārīte Slišāne ar geili, 1993.gods

Pādejā laikā Mārīte ir palykuse populara ar sovīm gordumīm Facebook, kur jei īlīk “gordūs” attālus, kam kluot ir pīvīnuoti cīši izjusti i puordūmu pylni dzejūļi. Starp cytu Mārīte dzejuļus roksta jov nu 15 godu vacuma, jai 2008.godie ir izdūts vīns prozas dorbu kūpkruojums kūpā ar Ilzi Keišu "Dzīves mīlēšana". 

Te vīns nu Mārītes daudzejīm dzejūļīm:

Īmeit pādu snīgā      
Dubļūs
Atstuot sauli īkuortu    
Līpā
Pīdzymt Lyldīnuos    
I šyupuotīs              
Reizie ar zvierbuļim
Salasiet mogiuņu buļceņu
Siekleņis
Pa vīnai, ūtrai, trešai
Sauvie, mutie
Kliepie…  
/2021.goda marts/               

Pirkumu grozs